2.14’ning asosiy yangiligi — solishtirma hisobot. Shuningdek, fan nomlari turlicha yozilganda tayyor imtihonlarni topish, CHSB sozlamalari va ball hisoblash yaxshilandi.
Asosiy yangilik — solishtirma hisobot
Bir chorakdagi natijani ko‘rish foydali. Uni oldingi chorak bilan yonma-yon qo‘yish esa qayerda o‘sish, qayerda pasayish borligini aniqlashga yordam beradi. 2.14’da shu ish uchun solishtirma hisobot ochildi.
«Qo‘shimcha imkoniyatlar» bo‘limida ikkita tugma mavjud: «Joriy jurnalni solishtirmaga qo‘shish» va «Solishtirma hisobotni ochish». Birinchisi ochiq jurnaldagi ma’lumotlarni saqlaydi, ikkinchisi avval qo‘shilgan jurnallar bilan ishlash oynasini ochadi.
I–II, II–III yoki III–IV chorak juftligini tanlab, bir nechta sinf va fan natijalarini bitta hisobotda ko‘rish mumkin.
Ikki chorakni qanday qo‘shish kerak?
- eMaktabda kerakli sinf, fan va birinchi chorak jurnalini oching.
- BSB Tahlil → «Qo‘shimcha imkoniyatlar» → «Joriy jurnalni solishtirmaga qo‘shish»ni bosing.
- eMaktabga qaytib, shu sinf va fanning ikkinchi chorak jurnalini oching. Kengaytmada jurnal ma’lumotlarini yangilab, uni ham solishtirmaga qo‘shing.
- Hisobotda tegishli chorak juftligini va ikkala choragi mavjud sinf–fanlarni tanlang.
- Natijalarni ko‘rib chiqing, zarur bo‘lsa Excelga yuklang yoki chop eting.
Hozircha faqat bir chorak natijasi tayyor bo‘lsa, uni saqlab qo‘ying. Keyingi chorak tugagach, o‘sha sinf va fan jurnalini qo‘shib solishtirasiz. Har bir jurnal alohida qo‘shiladi; barcha jurnallar avtomatik yig‘ilmaydi.
Bir xil jurnalni qayta qo‘shish uning saqlangan nusxasini yangilaydi. Jurnaldagi baholar o‘zgarganidan keyin uni yana qo‘shing: avval saqlangan nusxa o‘z-o‘zidan yangilanmaydi.
Hisobotda nimalar ko‘rinadi?
- Natijalar va ballar jadvali: BSB, CHSB, FB va jami ball bo‘yicha ikki chorak ko‘rsatkichlari hamda farqi.
- Baholar: 2, 3, 4 va 5 olgan o‘quvchilar sonining choraklar bo‘yicha o‘zgarishi.
- O‘quvchilar: bir o‘quvchining ikki chorak natijasi, qo‘shilgan yoki sinfdan chiqqan o‘quvchilar va yetishmayotgan ma’lumotlar.
- Manba: hisobotga olingan jurnal nusxalari, ma’lumot qamrovi va ogohlantirishlar.
Farqning birligiga e’tibor bering: jami ball farqi ballda, baholar soni farqi nafarda ko‘rsatiladi. Bajarilish 60% dan 70% ga ko‘tarilsa, farq +10 foiz punkt bo‘ladi. Ma’lumot yetishmasa, u nol deb hisoblanmaydi.
Saqlangan jurnallar shu brauzer va qurilmada turadi, maktab, hisob va o‘quv yili bo‘yicha ajratiladi. Boshqa qurilmada ishlash uchun jurnallarni u yerda ham qo‘shish kerak. Choraklar orasida sinf, fan yoki guruh nomi o‘zgargan bo‘lsa, moslikni tekshiring.
Excel va chop etish
Solishtirma hisobotni Excelga yuklash yoki «Bosma ko‘rinish» orqali chop etish mumkin. Excelda ballar, baholar, o‘quvchilar va manba/qamrov ma’lumotlari alohida varaqlarda beriladi.
Chop etishda «Yig‘ma hisobot» yoki «O‘quvchilar ro‘yxati» tanlanadi. Katta hisobotlar sahifalarga bo‘linadi; davom sahifalarida sarlavhalar takrorlanadi. Brauzerning chop etish oynasidan PDF sifatida saqlash ham mumkin.
Ekrandagi o‘quvchi qidiruvi faqat ko‘rinayotgan ro‘yxatni toraytiradi. Excel va bosmaga tanlangan sinf–fanlarning barcha natijalari kiritiladi. Eksportdan oldin chap paneldagi tanlovni tekshiring.
Bir chorakning o‘zini tahlil qilish uchun avvalgidek «Qo‘shimcha imkoniyatlar» → «Choraklik hisobot»dan foydalaning. Choraklik hisobot qo‘llanmasi →
Fan nomi boshqacha yozilsa ham imtihon topiladi
Ayrim maktablarda bir fan «Texnologiya», boshqasida «texnologiya», «Mehnat» yoki «mexnat» deb yozilgan. Oldin bu farq sabab tayyor imtihonlar ro‘yxati chiqmay qolishi mumkin edi.
2.14’da katta-kichik harf, ortiqcha bo‘shliq va turli apostroflar tenglashtiriladi. Muqobil nomlar lug‘atiga kiritilgan mehnat, mexnat, mehnat ta’limi va mexnat ta’limi variantlari Texnologiyaga moslashtiriladi. Jurnaldagi nomni o‘zgartirishingiz shart emas.
Bu moslashtirish tayyor imtihonlarni topishga yordam beradi. Har qanday noma’lum nom avtomatik taxmin qilinmaydi. Sinf va chorakni tekshirgandan keyin ham imtihon topilmasa, yordam guruhiga jurnaldagi fan nomi bilan yozing; kerakli variant lug‘atga qo‘shilishi mumkin.
CHSB sozlamalari va ball hisoblashdagi tuzatishlar
CHSB Test rejimida Bilish, Qo‘llash va Mulohaza uchun savol ballarini kiritib, har bir savolning yo‘nalishini tanlash mumkin. Savol maksimumlari va bog‘langan B/Q/M yig‘indilari shu sozlamalar asosida hisoblanadi. Katalogda juft shablon mavjud bo‘lsa, Test va B/Q/M tanlovi bitta imtihon ichida qoladi.
O‘nli ballar yig‘indisidagi hisoblash aniqligi ham yaxshilandi. Masalan, 0,1 + 0,2 natijasida keraksiz uzun kasr ko‘rinishi yoki noto‘g‘ri farq chiqishining oldi olindi.
Jurnalda ball butun songa yaxlitlangan bo‘lsa, tekshiruv buni hisobga oladi. Masalan, topshiriqlar yig‘indisi 18,5, jurnalda esa 19 bo‘lsa, «Yaxlitlab mos» belgisi chiqadi. Topshiriqlardagi asl ballar, jami va foizlar o‘zgartirilmaydi.
Ballarni kiritish va tekshirish qo‘llanmasi →
2.14’ga yangilang va jurnalni qayta yuklang
BSB Tahlil 2.14 Chrome Web Store va Firefox Add-ons’da mavjud. Brauzeringizdagi kengaytma versiyasini tekshiring:
- BSB Tahlilni 2.14 versiyaga yangilang.
- Ochiq eMaktab jurnalini qayta yuklang.
- Kengaytmani ochib, sinf, fan va chorakni tekshiring.
- Solishtirma uchun kerakli chorak jurnallarini navbat bilan qo‘shing yoki odatdagi BSB/CHSB tahlilini davom ettiring.
Chrome uchun BSB Tahlil · 
Firefox uchun BSB Tahlil
Amaliy ko‘rsatmalar: Telegramdagi video va matnli qo‘llanmalar. Savollar uchun yordam guruhiga yozing. Yangiliklarni rasmiy kanalda kuzatib boring.